Prokuroria Speciale e Kosovës ka ngritur aktakuzë ndaj dy personave, B.M dhe Q.M, të cilët akuzohen për një sërë veprash penale, përfshirë fajde, shpëlarje të parave, falsifikim dokumentesh, mashtrim dhe kanosje.
Sipas aktakuzës, gjatë vitit 2020, të pandehurit dyshohet se i kanë dhënë para me fajde të dëmtuarit disa herë, duke përfituar pasuri në mënyrë joproporcionale dhe të kundërligjshme. Për shkak të pamundësisë për t’i kthyer mjetet financiare, i dëmtuari ka humbur pronën e tij në Prishtinë, e cila dyshohet të jetë tjetërsuar nga të pandehurit.
Hetimet kanë zbuluar se B.M dhe Q.M, në bashkëkryerje, kanë konvertuar në mënyrë të paligjshme pasurinë e fituar nga aktiviteti kriminal me qëllim përfitimi personal dhe fshehje të vlerës reale. Vlera e dëmit të shkaktuar arrin në 6,3 milionë euro.
Prokuroria Speciale ka kërkuar nga Gjykata që të anulohen të gjitha veprimet juridike të kundërligjshme të të pandehurve.
