Prokuroria Speciale e Republikës së Kosovës ka ngritur aktakuzë ndaj të pandehurit M.A, në lidhje me ngjarjet e dhunshme të ndodhura më 29 maj 2023 në komunën e Zveçanit. Aktakuza është dorëzuar në Gjykatën Themelore në Prishtinë dhe përfshin katër vepra penale të rënda:
-
Sulm ndaj personit zyrtar;
-
Pjesëmarrje në turmë që kryen vepër penale – huliganizëm;
-
Blerje, posedim, shpërndarje dhe shitje e paautorizuar e narkotikëve;
-
Posedim i paautorizuar i armëve.
Sipas aktakuzës, M.A dyshohet se gjatë protestave të dhunshme në afërsi të objektit të Komunës së Zveçanit, që zgjatën nga mëngjesi deri në orët e mbrëmjes, ka sulmuar dhe kanosur pjesëtarë të Policisë së Kosovës dhe ushtarë të misionit paqeruajtës të KFOR-it. Gjatë përleshjeve, ai ka përdorur mjete të forta, shufra metalike, koktej molotovi, mjete shpërthyese të improvizuara dhe armë zjarri.
Prokuroria thekson se M.A ka vepruar në bashkëveprim me persona të tjerë dhe ka injoruar urdhrat e forcave paqeruajtëse për shpërndarje paqësore të turmës. Si pasojë e këtyre veprimeve, janë lënduar të paktën 30 ushtarë të KFOR-it dhe disa pjesëtarë të Policisë së Kosovës, ndërsa janë shkaktuar dëme të konsiderueshme materiale, përfshirë edhe automjete të mediave.
Gjatë hetimeve, autoritetet kanë sekuestruar një armë zjarri dhe sasi të substancave narkotike, për të cilat Prokuroria ka kërkuar konfiskimin dhe shkatërrimin e tyre, në përputhje me dispozitat ligjore.
Prokuroria Speciale i ka propozuar Gjykatës vazhdimin e masës së paraburgimit për të pandehurin, deri në përfundimin e shqyrtimit gjyqësor.
