Prokuroria Themelore në Prishtinë – Departamenti për Krime të Rënda ka ngritur aktakuzë kundër pesë personave: A.B., E.Q., F.S., S.M. dhe V.V., për dyshimin e bazuar mirë për kryerjen e veprave penale “Marrja e ryshfetit” dhe “Keqpërdorimi i pozitës apo autoritetit zyrtar”.
Sipas aktakuzës, A.B., instruktore në auto-shkollën “A.B A.F.”, dyshohet se ka pranuar 200 euro nga një e dëmtuar për të mundësuar kalimin e testit praktik të vozitjes, duke kryer kështu veprën penale të marrjes së ryshfetit.
Ndërkaq, F.S., E.Q., S.M. dhe V.V., anëtarë të Komisionit për licencimin dhe ndryshimin e kushteve hapësinore të auto-shkollave, dyshohen se kanë tejkaluar kompetencat e tyre që nga 04.04.2025, për të përfituar në mënyrë të kundërligjshme dobi materiale, duke kryer veprën penale “Keqpërdorimi i pozitës apo autoritetit zyrtar”.
Prokuroria ka pushuar pjesërisht hetimet ndaj E.L., për shkak se nuk ekziston dyshim i arsyeshëm për kryerjen e veprës penale të marrjes së ryshfetit.
Prokuroria Themelore në Prishtinë thekson përkushtimin e saj në luftimin e korrupsionit dhe ndjekjen penale të të gjithë personave të përfshirë, për të forcuar sundimin e ligjit dhe llogaridhënien institucionale.
