Kryetari i Lëvizjes Vetëvendosje, Albin Kurti, ka shprehur hapur zhgënjimin e tij ndaj refuzimit të Lidhjes Demokratike të Kosovës për të bashkëpunuar në një koalicion të ri qeverisës.
Gjatë mbledhjes së Këshillit të Përgjithshëm të Vetëvendosjes, Kurti komentoi me ironi qëndrimin e liderit të LDK-së, Lumir Abdixhiku, i cili refuzoi ftesën për një marrëveshje politike me VV-në. “Për ta ndihmuar daljen nga kjo bllokadë, i ftova kryetarët e partive PDK dhe LDK. Ky i dyti refuzoi të vijë, edhe pse disa deputetë të LDK-së kanë shprehur përkrahje për një marrëveshje politike. I shkrova edhe një letër tjetër për koalicion LVV-LDK, por edhe ajo u refuzua ashpër,” u shpreh Kurti.
Ai rikujtoi bashkëpunimin e kaluar midis dy partive, duke theksuar se LDK kishte qenë më e hapur për koalicion në vitin 2020. “Pas reformave të brendshme, pritej që LDK ta kishte më të lehtë bashkëpunimin. Por ndoshta rruga e re e saj ka tashmë preferenca të tjera,” shtoi ai.
Kurti theksoi se Lëvizja Vetëvendosje nuk është e interesuar për zgjidhje të përkohshme apo qeveri të kompromisit. “Ne duam qeveri normale, jo të përkohshme, jo të tranzicionit, e as të opozitës. Dorën në zemër, togfjalëshi ‘qeveri e opozitës’ është paradoksal – opozita është opozitë pikërisht sepse nuk është qeveri.”
Qëndrimet e Kurtit vijnë në një moment kritik politik për vendin, ndërsa mbetet e paqartë se cili do të jetë hapi i radhës në përpjekjet për formimin e një qeverie të qëndrueshme.
