Kryeministri në detyrë i Republikës së Kosovës, Albin Kurti, priti sot në një takim zyrtar në zyrën e tij ish-kryeministrin e Greqisë dhe deputetin aktual të PASOK-ut, George Papandreou. Vizita e Papandreout në Prishtinë ndodh në kuadër të angazhimeve të tij politike dhe pjesëmarrjes në aktivitetet e organizuara nga Unioni Ndërkombëtar i të Rinjve Socialistë (IUSY).
Në takim, të dy liderët diskutuan për thellimin e bashkëpunimit bilateral mes Kosovës dhe Greqisë, duke vënë theksin edhe te zhvillimet më të fundit politike në Kosovë dhe më gjerë në rajon.
Gjithashtu, bisedimet u fokusuan edhe në bashkëpunimin mes partive simotra që përfaqësojnë Kurti dhe Papandreou në Kosovë dhe Greqi, respektivisht Lëvizja Vetëvendosje dhe PASOK, duke rikonfirmuar interesin për forcimin e lidhjeve progresiste në nivel ndërkombëtar.
Më herët gjatë ditës, Papandreou dhe Kurti morën pjesë së bashku në hapjen zyrtare të punimeve të Këshillit Botëror të Unionit Ndërkombëtar të të Rinjve Socialistë (IUSY), që po zhvillohet në Prishtinë, një forum global që mbledh organizata rinore me orientim socialdemokrat dhe progresist nga e gjithë bota.
