Ambasada e Kosovës në Shtetet e Bashkuara të Amerikës ka ftuar bashkatdhetarët që të festojnë së bashku 18-vjetorin e shpalljes së Pavarësisë së Republikës së Kosovës.
Sipas njoftimit zyrtar, të hënën, më 16 shkurt, ambasada do t’i hapë dyert për komunitetin shqiptar në Uashington, D.C., duke organizuar një pritje festive me rastin e kësaj date historike për Kosovën.
“Të dashur bashkatdhetarë, jemi të nderuar dhe të kënaqur t’ju ftojmë të bashkoheni me ne në festimin e 18-vjetorit të Pavarësisë së Republikës së Kosovës në ambientet e Ambasadës në Uashington, D.C.”, thuhet në njoftimin e publikuar në rrjetin social X.
Kjo ngjarje synon të bashkojë bashkatdhetarët në SHBA në shenjë kujtimi, krenarie dhe reflektimi për rrugëtimin shtetëror të Kosovës, duke forcuar lidhjet mes komunitetit shqiptar dhe institucioneve të Republikës së Kosovës.
