Trajneri i Real Madridit, Carlo Ancelotti, ka deklaruar se klubi madrilen ka arritur qëllimin e tij duke siguruar kalimin në finalen e Copa del Rey. Real Madrid eliminoi Real Sociedadin në gjysmëfinalen e Kupës së Mbretit, pas një barazimi 4:4 në ndeshjen e dytë të zhvilluar në Santiago Bernabeu të martën, pas kohës shtesë. Ndeshja e parë ishte fituar 1-0, duke siguruar kalimin në finale për skuadrën e Ancelottit.
“Byllet një lojë argëtuese me shumë gabime dhe disa gjëra të mira. Ishte një ndeshje e argëtueshme. Jemi në finale, ia arritëm qëllimit. Mendoj se jemi mjaft mirë. Lojtarët që hynë nga stoli dhanë kontributin e tyre, ndërsa ata që luajtën nga fillimi e duruan ndeshjen mjaft mirë,” ka thënë Ancelotti, sipas raportimeve të gazetës spanjolle As.
Ai gjithashtu theksoi besimin e tij për finalen e Copa del Rey. “Nuk e kam menduar kurrë se do të eliminoheshim, sepse gjithçka mund të ndodhë në Santiago Bernabeu. Kur duhet të rikthehemi në lojë, ne nuk dorëzohemi kurrë. Ne kurrë nuk dorëzohemi, veçanërisht në fushën tonë, në shtëpi, me tifozët tanë,” shtoi trajneri i Real Madridit.
Në finalen e Copa del Rey, Real Madridi do të ndeshet me fituesin e ndeshjes mes Barcelonës dhe Atletico Madridit. Ndeshja e parë, e zhvilluar në Barcelonë, përfundoi me barazim 4:4, ndërsa ndeshja e kthimit është caktuar të luhet sonte në orën 21:30 në Madrid.
