Apple ka njoftuar se së shpejti do të lansojë një funksion të ri në Apple Watch, i cili sipas kompanisë mund të ndihmojë në zbulimin e tensionit të lartë të gjakut. Kompania pret që vetëm në vitin e parë, kjo veçori të identifikojë mbi një milion raste të hipertensionit të padiagnostikuar.
Funksioni, që pritet të miratohet së shpejti nga rregullatorët, do të përdorë sensorin e dritës për të analizuar reagimin e enëve të gjakut ndaj rrahjeve të zemrës. Nëse ora zbulon shenja të qëndrueshme të hipertensionit kronik, përdoruesi do të njoftohet. Megjithatë, ora nuk do të japë lexime të drejtpërdrejta të presionit të gjakut, por vetëm paralajmërime.
Apple rekomandon që përdoruesit që marrin njoftime të tilla të përdorin një aparat klasik me manshetë për të monitoruar tensionin gjatë një jave dhe të konsultohen me mjekun.
Ekspertët e shëndetit theksojnë se funksioni nuk mund të zëvendësojë matjet klinike. “Askush nuk duhet të bazojë vendime për trajtimin ose menaxhimin e sëmundjes vetëm mbi të dhënat e një ore inteligjente,” tha Dr. Felix Mahfoud, kryetar i kardiologjisë në Spitalin Universitar të Bazelit dhe zyrtar i Shoqatës Evropiane të Kardiologjisë.
Në testime me mbi 2,200 persona, funksioni tregoi një shkallë ndjeshmërie prej vetëm 41% dhe specifikitet prej 92%, çka nënkupton se ora mund të humbasë më shumë se gjysmën e rasteve të hipertensionit, por ka pak gjasa të japë alarme të rreme.
Funksioni do të jetë i disponueshëm në Apple Watch Series 9, Apple Watch Ultra 2 dhe watchOS 26, në mbi 150 shtete dhe rajone, përfshirë Bashkimin Evropian. Ai nuk rekomandohet për personat nën 22 vjeç, gratë shtatzëna ose ata që tashmë janë diagnostikuar me hipertension.
Sipas ekspertëve, edhe pse teknologjia ka kufizime, ajo mund të ndihmojë në rritjen e ndërgjegjësimit për një gjendje që prek rreth 1.3 miliardë njerëz në botë, shumica prej të cilëve nuk e dinë se e kanë.
