Shpresat për një marrëveshje armëpushimi në Rripin e Gazës kanë marrë një kthesë të ndërlikuar, pasi kryeministri izraelit Benjamin Netanyahu ka konfirmuar se do të dërgojë ekipin negociator në Doha, por e ka quajtur “të papranueshme” listën e ndryshimeve të kërkuara nga Hamasi mbi draftin aktual të armëpushimit.
Netanyahu e bëri publik vendimin pas mbledhjes së Këshillit të Sigurisë Kombëtare, duke deklaruar se ndryshimet e propozuara bien ndesh me interesat e Izraelit, por se vendi është i gatshëm të vijojë bisedimet përmes ndërmjetësve të Katarit, Egjiptit dhe SHBA-së.
Drafti i armëpushimit, i hartuar sipas planit të ndërmjetësit amerikan Steve Witkoff, parashikon një pauzë dy mujore të luftimeve, gjatë së cilës Hamasi do të lirojë 28 pengje (10 të gjallë dhe 18 trupa), ndërsa Izraeli do të tërheqë trupat nga disa zona dhe do të lejojë dërgimin e ndihmës humanitare.
70 viktima nga sulmet e fundit – dy amerikanë të plagosur
Situata në terren mbetet e përgjakshme. Sipas burimeve nga Ministria e Shëndetësisë në Gaza, vetëm dje 70 palestinezë janë vrarë nga sulmet ajrore të Forcave të Mbrojtjes Izraelite (IDF), duke e rënduar edhe më tej bilancin e viktimave. Al Jazeera raporton se disa prej viktimave ndodheshin në radhë për të marrë ndihmë humanitare, përfshirë tre fëmijë.
Po ashtu, dy kontraktorë amerikanë u plagosën nga shpërthimi i dy granatave pranë një pike shpërndarjeje ndihmash në Rafah. Ushtria izraelite e konfirmoi incidentin, duke akuzuar Hamasin për sabotim të ndihmës humanitare.
Tension politik dhe diplomaci intensive
Në një zhvillim paralel, Netanyahu ka pasur një bisedë telefonike me kryeministren italiane Giorgia Meloni, e cila ka kërkuar armëpushim të menjëhershëm, lirimin e pengjeve dhe hyrjen pa kushte të ndihmës humanitare për civilët në Gaza. Meloni ka komunikuar gjithashtu me Emirin e Katarit, Tamim bin Hamad al Thani, duke vazhduar kontaktet diplomatike të nisura që në samitin e G7-ës.
Ndërkohë, Netanyahu ndodhet sot në Uashington, ku do të takohet me presidentin amerikan Donald Trump, i cili është shprehur optimist për arritjen e një armëpushimi këtë javë.
Protesta në Izrael – Familjet e pengjeve kërkojnë zgjidhje gjithëpërfshirëse
Në Tel Aviv dhe qytete të tjera izraelite, dhjetëra mijëra protestues janë bashkuar me familjet e pengjeve, duke kundërshtuar zgjidhjet e pjesshme të parashikuara në draftin aktual. Forumi i Familjeve të Pengjeve ka paralajmëruar se mënyra e përzgjedhjes së emrave të lirimit, e ndarë në faza dhe lista të ndara, krijon “një pasiguri të padurueshme” dhe është krahasuar me “listat e Schindler-it” të Holokaustit.
Sipas burimeve diplomatike, negociatat në Doha pritet të vazhdojnë me intensitet gjatë javës, me ndërmjetësimin e Katarit dhe SHBA-së, ndërsa dyshimet mbeten të forta për mundësinë e një marrëveshjeje përfundimtare në ditët në vijim.
