Drejtoria Rajonale e Policisë në Pejë ka njoftuar se gjatë muajit shtator (01.09.2025 – 30.09.2025), Stacioni Policor në Pejë ka ekzekutuar një sërë urdhëresash të lëshuara nga gjykatat, duke arrestuar gjithsej tridhjetë e nëntë (39) persona të kërkuar.
Sipas njoftimit, të arrestuarit dyshohen për vepra të ndryshme penale. Nga ta, katërmbëdhjetë (14) persona janë dërguar për vuajtje të dënimit në qendrat e paraburgimit, ndërsa të tjerët janë paraqitur në seanca gjyqësore dhe pas pagesës së dënimit me gjobë janë liruar.
Policia rajonale e Pejës ka theksuar se do të vazhdojë me realizimin e urdhëresave të lëshuara nga gjykatat kompetente, duke shtuar se angazhimi në këtë drejtim mbetet prioritet i punës policore në rajon.