Policia e Kosovës ka arrestuar tre persona të dyshuar për shitblerje dhe posedim të substancave narkotike gjatë një aksioni të ndërmarrë më 16 korrik 2025 në rajonin e Prizrenit. Veprimet janë kryer nga Drejtoria për Hetimin e Trafikimit me Narkotikë, në kuadër të planit operativ “Sezoni Veror 2025”.
Sipas njoftimit zyrtar, hetuesit policorë kanë vëzhguar një skenë të dyshimtë të shitjes së narkotikëve mes tre personave që ndodheshin në dy vetura të ndara. Në përpjekje për t’i ikur kapjes, dy nga të dyshuarit kanë shkaktuar aksident duke goditur dy vetura të parkuara, por më pas janë arrestuar së bashku me personin e tretë.
Në vijim të hetimeve, policia ka bastisur shtëpitë e dy prej të dyshuarve, ku janë gjetur dhe sekuestruar:
-
2 kg e 358 gramë marihuanë, e ndarë në doza për shitje – vlerësuar me rreth 11,000 euro në tregun ilegal;
-
115 euro para të gatshme;
-
Një peshore elektronike dhe material për paketim, përfshirë qese dhe foli najloni;
-
Dy telefona mobilë dhe një veturë me targa vendore.
Pas intervistimit në prani të avokatëve, me vendim të prokurorit të shtetit, dy nga të dyshuarit janë ndaluar për 48 orë, ndërsa ndaj të tretit është iniciuar procedurë e rregullt për posedim të narkotikëve, në bazë të nenit 269 të Kodit Penal të Republikës së Kosovës.
Hetimet ndaj të dyshuarve do të vazhdojnë në koordinim me Prokurorinë për zbardhjen e plotë të rastit.
