Kosovo Police ka arrestuar tre persona të dyshuar për veprën penale “vjedhje e rëndë”, pas dy rasteve të raportuara të thyerjes së lokaleve në Mitrovicë.
Sipas njoftimit zyrtar, në orët e hershme të mëngjesit të 19 shkurtit 2026, në Stacionin Policor Mitrovicë Jugu janë raportuar dy raste të ndara të thyerjes së lokaleve në zona të ndryshme të qytetit.
Njësitë kompetente policore kanë reaguar menjëherë dhe, pas disa orësh veprime intensive operative dhe hetimore, kanë arritur të identifikojnë tre persona të dyshuar. Gjatë kontrollit, tek të dyshuarit janë gjetur gjësendet e raportuara si të vjedhura nga lokalet e thyera.
Njëri nga të dyshuarit është i mitur. Të tre janë arrestuar dhe shoqëruar në stacionin policor, ku pas intervistimit dhe procedurave të tjera të nevojshme, është iniciuar rasti penal për “Vjedhje e rëndë”.
Me vendim të prokurorit, të dyshuarve u është caktuar masa e ndalimit policor prej 48 orësh, ndërsa hetimet për rastin po vazhdojnë.
