Policia e Kosovës ka bërë të ditur se Njësia e Hetimeve të Përgjithshme e Rajonit të Prishtinës ka realizuar me sukses arrestimin e një personi të dyshuar, i cili lidhet me dy raste të ndara që kanë rrezikuar sigurinë publike në lagjen Ulpiana të kryeqytetit.
Rasti i parë ndodhi më 20 maj 2025, kur një qytetar u sulmua fizikisht përballë ordinancës së tij nga një person i panjohur, duke pësuar lëndime të lehta trupore. Vetëm katër ditë më vonë, më 24 maj, në hyrje të së njëjtës ordinancë u gjet një granatë dore e tipit F-1 pa mekanizëm ndezës. Mjeti shpërthyes u largua në mënyrë të sigurt nga Njësia për Trajtimin e Mjeteve Eksploduese (NJTME).
Pas hetimeve intensive, më 27 maj në Fushë Kosovë u arrestua njëri nga të dyshuarit. Gjatë bastisjes në banesën ku qëndronte me qira, janë sekuestruar prova të rëndësishme që lidhen me rastet.
Sipas vendimit të Prokurorit të Shtetit, i dyshuari është ndaluar për 48 orë dhe ndaj tij rëndojnë veprat penale “Kanosje” dhe “Lëndim i lehtë trupor”.
Hetimet janë ende në vazhdim, në bashkëpunim të ngushtë me Prokurorinë, me synim identifikimin e të dyshuarve të tjerë dhe zbardhjen e plotë të ngjarjes.
Policia e Kosovës shpreh mirënjohje për bashkëpunimin e qytetarëve dhe thekson përkushtimin për të garantuar sigurinë publike, për të parandaluar rreziqet dhe për të ndjekur çdo vepër penale që cenon rendin dhe qetësinë.
