Policia e Kosovës ka arrestuar një person të dyshuar për përfshirje në një rast të plagosjes me armë zjarri, që ka ndodhur më 12 korrik në fshatin Gojbuljë të Vushtrrisë.
Sipas njoftimit zyrtar, i dyshuari F.A., 40-vjeç, është ndaluar nën dyshimin për veprën penale “vrasje në tentativë”. Ai dyshohet se ka qenë i përfshirë në një incident ku një burrë, që po ruante një pronë private, ka mbetur i plagosur nga të shtënat me armë.
Në vendin e ngjarjes, policia ka sekuestruar dy gëzhoja të armës së zjarrit si prova materiale. Hetimet e deritanishme kanë identifikuar edhe dy persona të tjerë, të cilët dyshohen për përfshirje në rast dhe aktualisht janë në kërkim policor.
Pas intervistimit, ndaj të dyshuarit F.A. është caktuar masa e ndalimit policor, me vendim të prokurorit kompetent. Ndërkohë, hetimet për zbardhjen e plotë të rastit janë në vazhdim.
