Policia e Kosovës ka njoftuar se ka arrestuar një person të kërkuar nga drejtësia, i cili ishte dënuar me katër vite e 100 ditë burgim efektiv për vepra penale të vjedhjes dhe vjedhjes grabitqare.
Sipas njoftimit, mëngjesin e së hënës, Njësia e Ndërlidhjes me Gjykatën pranë Stacionit Policor në Prizren–Veri, pas veprimeve operative dhe hetimore, ka ekzekutuar urdhër-arrestin e lëshuar nga Gjykata Themelore në Prizren ndaj B.S., 36 vjeçar, banor i fshatit Malësi e Re, Komuna e Prizrenit.
I njëjti ishte në kërkim aktiv, pasi vendimi gjyqësor ndaj tij kishte marrë formë të prerë. Pas arrestimit, ai është dërguar menjëherë në institucionin korrektues për të vuajtur dënimin e shqiptuar.
Policia e Kosovës theksoi se mbetet e përkushtuar në realizimin e urdhër-arresteve dhe në zbatimin e vendimeve gjyqësore me qëllim të garantimit të rendit dhe sigurisë publike.
