Prokuroria Speciale ka ndaluar për 48 orë një person me inicialet L. M., i dyshuar për sulm ndaj pjesëtarëve të KFOR-it dhe Policisë së Kosovës.
Sipas njoftimit, arrestimi është kryer pas hetimeve disa mujore të zhvilluara nga hetuesit policorë, ndërsa i dyshuari është ndaluar në komunën e Zveçanit.
L. M. dyshohet për disa vepra penale, përfshirë:
-
bashkim për veprimtari kundërkushtetuese,
-
rrezikim të personave nën mbrojtje ndërkombëtare,
-
pjesëmarrje në turmë që kryen vepër penale dhe huliganizëm,
-
si dhe sulm ndaj personit zyrtar.
Me autorizim të prokurorit, policia ka zhvilluar bastisje edhe në shtëpinë e të dyshuarit, ku janë gjetur prova materiale që lidhen me veprimtarinë e tij të dyshuar kriminale.
Prokuroria Speciale ka bërë të ditur se, brenda afatit ligjor, ndaj të dyshuarit do të paraqitet kërkesë për caktimin e masës së paraburgimit në Gjykatën Themelore të Prishtinës.
