Policia e Kosovës ka bërë të ditur se ka dërguar në mbajtje një person të dyshuar për veprën penale të grabitjes, e cila kishte ndodhur më 26 dhjetor 2025 në një vilë në fshatin Qagllavicë, në afërsi të Prishtinës.
Sipas njoftimit zyrtar, zyrtarët e Njësisë së Hetimeve të Përgjithshme në Prishtinë kanë arritur të sigurojnë prezencën e të dyshuarit pas veprimeve intensive hetimore. I dyshuari, me inicialet V.B., 32-vjeçar, shtetas i Republikës së Kosovës, është arrestuar dhe me vendim të prokurorit të shtetit është dërguar në mbajtje.
Policia njofton se hetimet për këtë rast janë ende në zhvillim dhe se puna për arrestimin e personit të dytë të dyshuar, i cili dyshohet të jetë i përfshirë në këtë grabitje, po vazhdon.
Autoritetet kanë bërë të ditur se për detaje të tjera lidhur me rastin do të njoftohet opinioni publik me kohë.
