Prokuroria Speciale e Kosovës në bashkëpunim me Policinë e Kosovës ka arrestuar një person të dyshuar për krime lufte ndaj popullsisë civile.
I dyshuari me inicialet S.S. është ndaluar për 48 orë, pasi dyshohet se gjatë luftës së fundit në Kosovë ka kryer veprën penale “Krime lufte kundër popullsisë civile” në Komunën e Vushtrrisë.
Arrestimi i tij është kryer nga hetuesit e Drejtorisë për Hetimin e Krimeve të Luftës, në pikën kufitare në Merdarë, gjatë hyrjes nga Serbia në Kosovë.
Sipas komunikatës së përbashkët të Prokurorisë Speciale dhe Policisë së Kosovës, aktualisht po ndërmerren të gjitha veprimet hetimore dhe procedurale në përputhje me Kodin e Procedurës Penale.
Brenda afateve ligjore, ndaj të dyshuarit do të paraqitet kërkesë në Gjykatën Themelore në Prishtinë për caktimin e masës së paraburgimit.
