Prokuroria Speciale e Kosovës ka bërë të ditur se në orët e para të mëngjesit të së enjtes është arrestuar M.D, shtetas serb, nën dyshimet për krime lufte të kryera gjatë viteve 1998–1999 në komunën e Zveçanit.
Arrestimi është kryer me urdhër të prokurores speciale Florije Salihu-Shamolli, pas një hetimi disa mujor të zhvilluar në bashkëpunim me Hetuesit për Krime Lufte.
Sipas të dhënave hetimore, M.D dyshohet se gjatë luftës në Kosovë ka vepruar si komandant i Njësisë së Policisë në kuadër të Ministrisë së Punëve të Brendshme të Serbisë (MUP) në këtë rajon. Ai akuzohet për përfshirje në vrasje, dëbime me forcë, plaçkitje, tortura dhe rrahje të civilëve shqiptarë.
Prokuroria thekson se gjatë muajit prill të vitit 1999, i dyshuari M.D, së bashku me forca të organizuara serbe, përfshirë Ushtrinë Jugosllave dhe Policinë Serbe, ka marrë pjesë në një operacion ushtarak në fshatin Zhazhë, ku mbetën të vrarë shtatë civilë shqiptarë.
Pas përfundimit të luftës, trupat e viktimave janë gjetur në varrezat e fshatit Suhodoll, në komunën e Mitrovicës.
Prokuroria Speciale ka paralajmëruar se, brenda afateve ligjore të parashikuara me Kodin e Procedurës Penale, do të paraqesë në Gjykatën Themelore të Prishtinës – Departamenti Special, kërkesën për caktimin e masës së paraburgimit ndaj të dyshuarit.
