Policia e Kosovës ka arrestuar një person nën dyshimin se ka kryer vrasjen dhe groposjen e Enver Bajraktarit, 45 vjeç, në fshatin Baicë të Lipjanit. Sipas burimeve, i dyshuari ka lidhje familjare me viktimën.
Trupi i Bajraktarit u gjet më 4 gusht, i groposur disa metra nën sipërfaqe, i mbuluar me dërrasa, në një arë të mbjellë me misër. Hetuesit dhe familjarët arritën ta lokalizojnë trupin pas gjurmëve që tregonin tërheqjen e tij me forcë drejt një gropë të improvizuar.
“Kanë hi me vëzhgu… lëvizja e fundit u kanë te kjo shtëpi këtu. Në bazë të aty janë ardh kanë lyp qetu. Ata djemtë që kanë ardh, tu lyp nëpër arë përmes shtagës, tani aty e kanë pa që ka zvarritje”, ka deklaruar një familjar i viktimës.
Bajraktari ishte raportuar i zhdukur një ditë më parë nga familja. Pas gjetjes së trupit, Policia nisi menjëherë hetimet për zbardhjen e rrethanave të vdekjes.
Më 5 gusht, Prokuroria konfirmoi identitetin e viktimës si Enver Bajraktari, ndërsa më 6 gusht ai u varros në fshatin e tij të lindjes, Baicë të Lipjanit.
Hetimet për këtë rast po vazhdojnë në koordinim me Prokurorinë Themelore të Prishtinës, ndërsa i dyshuari ndodhet në paraburgim.
