Gazeta Sinjali mëson ekskluzivisht se është arrestuar edhe personi i dytë i dyshuar për vendosjen e një granate dore në hyrje të ordinancës private “Medica”, që ndodhet në lagjen Ulpiana të Prishtinës.
Pas arrestimit të parë të Burhan Mavriqit, rreth 32-vjeç, më 27 maj, hetuesit policorë kanë vijuar hetimet intensive. Si rezultat, më 3 qershor është arrestuar edhe Arbnor Shala, rreth 33-vjeçar, i dyshuari i dytë lidhur me këtë rast që ka shkaktuar shqetësim te qytetarët dhe institucionet.
Burime të sigurta të Gazetës Sinjali bëjnë të ditur se Shala është ndaluar për 48 orë me urdhër të Prokurorisë, ndërkohë që hetimet janë ende në zhvillim për të zbuluar motivin dhe për të identifikuar ndonjë bashkëpunëtor të mundshëm.
Kujtojmë se incidenti ndodhi më 24 maj, kur në hyrje të ordinancës “Medica” u gjet një granatë dore e tipit F-1, pa ndezës, e cila fatmirësisht nuk shpërtheu. Mjeti shpërthyes u largua në mënyrë të sigurt nga njësitë speciale të Policisë së Kosovës.
