Policia e Kosovës ka arrestuar një zyrtar të administratës lokale nën dyshimin për veprën penale “Marrje ryshfeti”.
Sipas njoftimit zyrtar, Njësia Rajonale për Hetimin e Krimeve Ekonomike dhe Korrupsionit në Gjakovë, në bashkëpunim me Prokurorinë Themelore, ka zhvilluar veprime hetimore pas pranimit të informatave për korrupsion. Me urdhër të Gjykatës kompetente është zbatuar një masë e veçantë hetimore, gjatë së cilës janë siguruar prova materiale.
Paratë që ishin objekt i simulimit janë sekuestruar në cilësinë e provës materiale. I dyshuari është intervistuar në prani të avokatit të tij, por ka vendosur të ushtrojë të drejtën e heshtjes.
Pas përfundimit të procedurave fillestare, prokurori i Shtetit ka lëshuar aktvendim për ndalim prej 48 orësh ndaj tij. Hetimet janë ende në fazën fillestare dhe pritet të vazhdojnë për zbardhjen e plotë të rastit.
Policia e Kosovës ka theksuar se mbetet e përkushtuar në luftën kundër korrupsionit dhe çdo veprimi të paligjshëm që cenon integritetin institucional.
