Shoferët që përdorin autostradat austriake pa vinjetë të vlefshme nga fillimi i vitit 2026 do të përballen me gjoba shumë më të rënda, ndërsa autoritetet kanë vendosur politikë me tolerancë zero. Çdo pakujdesi apo gabim në vendosjen e vinjetës tashmë mund të kthehet në një barrë serioze financiare për familjet.
Sipas vendimit të ASFINAG, tarifa zëvendësuese për mospagimin e taksës rrugore është rritur ndjeshëm. Shoferët e automjeteve deri në 3.5 ton që kapen pa vinjetë të vlefshme – qoftë fizike apo digjitale – do të gjobiten me 200 euro, nga 120 euro sa ishte më parë. Edhe motoçiklistët nuk përjashtohen më, pasi gjoba për ta është rritur në 100 euro.
Autoritetet paralajmërojnë se nuk mjafton vetëm blerja e vinjetës. Nëse ajo është vendosur gabimisht, trajtohet njësoj sikur të mos ekzistonte fare. ÖAMTC thekson se përdorimi i filmave mbrojtës, mbajtëseve me vakum apo shiritave ngjitës që pengojnë kontaktin direkt të vinjetës me xhamin e përparmë është rreptësisht i ndaluar. Gjithashtu, vinjeta nuk duhet të vendoset mbi pjesë të lyera të xhamit, një gabim i shpeshtë mes shoferëve.
Tarifa e zëvendësimit mund të paguhet menjëherë në vend, por nëse shoferi refuzon pagesën, procedura kundërvajtëse çon gjobën në minimum 300 euro, ndërsa në raste të rënda ajo mund të arrijë deri në 3,000 euro.
Përveç gjobave, janë rritur edhe çmimet e vetë vinjetave, mesatarisht me 2.9 për qind. Vinjeta vjetore për automjetet e pasagjerëve tani kushton 106.80 euro, ndërsa për motoçiklistët 42.70 euro.
Viti 2026 shënon edhe fundin e vinjetave prej letre. Nga viti 2027, Austria do të kalojë ekskluzivisht në vinjeta digjitale, me synim forcimin e kontrollit dhe uljen e abuzimeve.
Autoritetet u bëjnë thirrje të gjithë shoferëve, veçanërisht bashkatdhetarëve që udhëtojnë shpesh në Austri, të kontrollojnë me kujdes vlefshmërinë dhe vendosjen e vinjetës para se të hyjnë në autostradë, pasi në vitin 2026 “harresa” nuk do të falet më.
