Avokatja e ish-presidentit të Kosovës, Hashim Thaçi, Sophie Menegon, ka kërkuar zyrtarisht nga Dhomat e Specializuara në Hagë ndarjen e procedurës penale ndaj klientit të saj në çështjen për pengim të administrimit të drejtësisë, për shkak të përfshirjes së Thaçit në një tjetër proces gjyqësor të rëndësishëm – atë për krime lufte dhe krime kundër njerëzimit, ku ai gjykohet së bashku me Kadri Veselin, Jakup Krasniqin dhe Rexhep Selimin.
Kërkesa, e dorëzuar më 7 maj 2025, argumenton se çështja për krime lufte ka hyrë në një fazë intensive dhe vendimtare, dhe se zhvillimi paralel i dy proceseve e bën të pamundur për Thaçin dhe ekipin e tij të mbrojtjes të kenë një gjykim të drejtë.
“Biznesi kryesor i mbrojtjes është tani hartimi i mocioneve për rrëzimin e akuzave për krime lufte. Kjo është një fazë kyçe që kërkon përfshirje aktive të z. Thaçi dhe përkushtim të plotë të ekipit mbrojtës,” thekson Menegon në parashtresë, raportuar nga Betimi për Drejtësi.
Dy gjykime, një standard i papranuar
Menegon kujton se asnjë tribunal ndërkombëtar nuk ka zhvilluar dy gjykime njëkohësisht ndaj të njëjtit të akuzuar, duke përmendur raste konkrete nga Gjykata Penale Ndërkombëtare dhe ajo për Ish-Jugosllavinë. Në secilin rast, një procedurë është pezulluar për t’i lënë hapësirë tjetrës, duke ruajtur standardin e “gjykimit të drejtë”.
“Paralelizmi i proceseve nuk është vetëm teknikisht i vështirë, por minon seriozisht të drejtën e z. Thaçi për përfaqësim të duhur dhe përgatitje të plotë në secilin rast,” thuhet në dokumentin e dorëzuar.
Presioni financiar dhe mungesa e burimeve
Një tjetër arsye madhore që paraqet mbrojtja është pamundësia financiare për të përballuar dy ekipe të ndara juridike. Menegon sqaron se Thaçi nuk përfiton ndihmë juridike publike dhe ka shpenzuar të gjitha burimet e tij financiare për mbrojtjen në rastin për krime lufte.
Ekipi i tij aktual ligjor është i përfshirë në të dy çështjet, dhe pjesëtarët e tij po japin kontribut në rastin për administrimin e drejtësisë në mënyrë pro bono apo me kompensim simbolik.
Mbrojtja: Rasti për administrimin e drejtësisë të shtyhet
Nëse gjykata pranon kërkesën e mbrojtjes, procedura ndaj Thaçit për pengim të drejtësisë do të pezullohej deri në përfundimin e gjykimit për krime lufte, që sipas vlerësimeve të mbrojtjes mund të përfundojë në fund të vitit 2025 ose fillim të 2026-ës.
“Ky është opsioni i vetëm për të garantuar një proces të drejtë dhe për të mos dëmtuar as të drejtat e bashkë të akuzuarve në të dyja çështjet,” thuhet në kërkesë.
Akuzat ndaj Thaçit
Përveç akuzave për krime lufte dhe krime kundër njerëzimit, ndaj Thaçit rëndojnë edhe akuza për pengim të drejtësisë, ku ai dyshohet se, përmes ndërmjetësimit me grupe të ndryshme, ka ndikuar mbi dëshmitarët gjatë vizitave në paraburgim në vitin 2023.
Në këtë rast janë përfshirë edhe emra si Fadil Fazliu, Bashkim Smakaj, Isni Kilaj dhe Hajredin Kuçi, të cilët akuzohen për tentativa për pengim të zyrtarëve dhe mosbindje ndaj gjykatës.
Në pritje të vendimit
Kërkesa e mbrojtjes së Thaçit për veçimin e procedurave ndodhet tani në duart e gjykatëses së procedurës paraprake. Vendimi përfundimtar pritet të përcaktojë nëse ish-presidenti do të përballet me dy procese gjyqësore njëkohësisht apo në mënyrë të ndarë, siç kërkon mbrojtja.
Për më tepër, nëse kërkesa pranohet, pritet që procesi për administrimin e drejtësisë ndaj Thaçit të rifillojë vetëm pas mbylljes së fazës përfundimtare në çështjen e krimeve të luftës.
