Një aheng familjar në fshatin Kozhicë të Skenderajt është kthyer në objekt hetimi, pasi të shtënat me armë zjarri çuan në identifikimin e dy personave të dyshuar, babë e bir.
Sinjali mëson se të dyshuarit janë Faik Beqiri rreth 47-vjeç dhe djali i tij E. Beqiri rreth 16-vjeç.
Më 26 korrik, rreth orës 21:20, Policia ishte njoftuar për të shtëna me armë gjatë një ahengu familjar në rrugën “Halim Brahimi” në Kozhicë. Me të mbërritur në vendin e ngjarjes, pronari i shtëpisë kishte pranuar se gjatë ahengut ishin dëgjuar të shtëna.
Gjatë ekzaminimit, njësitë policore dhe Krim-Teknika sekuestruan 46 gëzhoja të kalibrave të ndryshëm, përfshirë 35 gëzhoja të armës me gaz (9 mm), 3 gëzhoja të kalibrit 7.62 mm TT, 3 gëzhoja të kalibrit 9×19 mm dhe 5 gëzhoja të kalibrit 8 mm, çka ngriti dyshime se në aheng ishin përdorur më shumë se një armë.
Hetimet vazhduan edhe pas ngjarjes, ndërsa më 29 korrik, me urdhër të Prokurorit të Shtetit, Policia bastisi një shtëpi në Klinë e Mesme të Skenderajt.
Gjatë bastisjes u sekuestrua një armë e shkurtër me gaz, për të cilën dyshohet se ishte përdorur gjatë ahengut. Sipas dyshimeve të hetuesve, arma i përkiste Faik Beqirit, i cili dyshohet se ia kishte dhënë djalit të tij 16-vjeçar, E. Beqirit, që ta përdorte gjatë festës familjare.
Të dy të dyshuarit janë intervistuar nga hetuesit, ndërsa me vendim të Prokurorit janë liruar në procedurë të rregullt.
Rasti po hetohet për veprat penale “Përdorim i armës” dhe “Mbajtje në pronësi, kontroll ose posedim të paautorizuar të armës”.
