Deputetja e Lidhjes Demokratike të Kosovës, Hykmete Bajrami, ka ngritur alarmin për rritjen drastike të importit të energjisë gjatë muajit qershor, duke e cilësuar si pasojë direkte të menaxhimit të keq nga ana e Qeverisë Kurti.
Sipas Bajramit, vetëm brenda një muaji – nga maji në qershor – importi i energjisë është rritur për plot 800%, gjë që ka ndikuar edhe në rritjen e qarkullimit financiar. Ajo thekson se ky qarkullim vjen jo si rezultat i zhvillimit të ekonomisë, por për shkak të blerjes së energjisë me çmime shumë më të larta nga tregu ndërkombëtar.
“Derisa 1 MWh që KESCO e blen nga KEK-u kushton vetëm 29.6 euro, nga kompanitë e tjera si NOA çmimi mund të jetë dhjetëra herë më i lartë,” shkroi Bajrami në një reagim në rrjete sociale.
Ajo rikujtoi edhe rastin e dhjetorit 2024, kur Kosova pagoi 798 euro vetëm për transportin e 1 MWh energji, duke e cilësuar këtë si tregues të qartë të menaxhimit joefikas të sektorit të energjisë nga ana e qeverisë aktuale.
“Ky është qarkullimi e ‘zhvillimi’ që ka sjellë LVV,” përfundon Bajrami, duke ironizuar efektin negativ të politikave energjetike të ekzekutivit.
