Federata Spanjolle e Futbollit ka miratuar zyrtarisht kërkesën për zhvendosjen e ndeshjes së La Ligës mes Villarrealit dhe Barcelonës nga Spanja në Shtetet e Bashkuara. Sfidën e raundit të 17-të të kampionatit, e cila ishte parashikuar si ndeshje në shtëpi për Villarrealin, pritet të zhvillohet më 20 dhjetor në stadiumin Hard Rock të Miamit – shtëpia e Inter Miami, skuadra ku aktualisht luan ish-ylli i Barcelonës, Lionel Messi.
Ky hap e afron La Ligën drejt realizimit të synimit të saj për të luajtur ndeshje të sezonit të rregullt jashtë vendit, pjesë e strategjisë për promovimin e futbollit spanjoll dhe rritjen e markës në tregjet ndërkombëtare. Liga ka një partneritet afatgjatë me kompaninë Relevent Sports, pjesë e grupit të biznesmenit Stephen Ross, i cili zotëron edhe Hard Rock Stadium, ekipin e Miami Dolphins, garën Formula 1 Miami Grand Prix dhe turneun e tenisit Miami Open.
Kërkesa e miratuar nga Federata do të dërgohet për aprovimin përfundimtar të UEFA-s dhe FIFA-s. Nëse marrin dritën jeshile, kjo do të jetë hera e parë që një ndeshje zyrtare e La Ligës luhet në SHBA.
Më herët, në vitin 2018, një përpjekje e ngjashme për të zhvilluar ndeshjen mes Barcelonës dhe Gironës në Miami u anulua pas kundërshtimeve nga lojtarë, tifozë dhe disa klube. Edhe nismat e mëvonshme nuk patën sukses.
Megjithatë, FIFA vitin e kaluar bëri hapa drejt ndryshimit të rregullave tradicionale, duke shqyrtuar politikën që ndalon zhvillimin e ndeshjeve të kampionateve kombëtare jashtë vendeve përkatëse.
Përkundër qëllimit për promovim global, vendimi ka gjasa të ndeshet me kundërshtime nga tifozët, të cilët mund të mos jenë të kënaqur me zhvendosjen e ndeshjeve në shtëpi të ekipeve të tyre mijëra kilometra larg. Në sportet profesioniste amerikane, megjithatë, është bërë praktikë organizimi i ndeshjeve jashtë vendit, si në Evropë, Azi dhe Amerikën e Jugut, për të zgjeruar bazën e tifozëve dhe për të rritur ndikimin e markës.
Ky zhvillim vjen në një periudhë kur Shtetet e Bashkuara po bëhen gjithnjë e më shumë epiqendra e ngjarjeve madhore të futbollit botëror – me Kupa e Botës 2026 që do të mbahet në SHBA, Kanada dhe Meksikë, dhe me Kupën e Botës për Klube të zgjeruar që së fundmi është zhvilluar në SHBA.
