Klubi i madh spanjoll Barcelona po ndjek nga afër formën dhe zhvillimin e sulmuesit të përfaqësueses së Kosovës, Fisnik Asllani, i cili po shkëlqen në Bundesligë me ekipin e Hoffenheim.
Sipas raportimeve nga media ndërkombëtare, skautët e Barcelonës kanë monitoruar disa ndeshje të Asllanit gjatë këtij sezoni, duke e përfshirë në listën e mundshme të transferimeve për vitin e ardhshëm.
Asllani, i lindur në Berlin, ka pasur një rritje të ndjeshme në karrierën e tij që nga edicioni i kaluar. Pasi u huazua te Elversberg në Bundesligën 2, ai ka fituar vendin e titullarit te Hoffenheim, ku po shfaq performanca mbresëlënëse.
Nga vera e vitit 2024, 23-vjeçari ka realizuar 24 gola dhe ka dhënë 12 asiste në 44 paraqitje zyrtare. Ai ka kontratë me klubin gjerman deri në vitin 2029, por një klauzolë nën 30 milionë euro mund ta bëjë transferimin e tij të realizueshëm për çdo klub të interesuar.
Asllani shënoi së fundmi edhe golin e vetëm të përfaqësueses së Kosovës në ndeshjen ndaj Suedisë, në kuadër të kualifikimeve për Kampionatin Botëror 2026.
