Numri legjendar “10″ në fanellën e Barcelonës ka qenë për vite të tëra simbol i yjeve që kanë lënë gjurmë të thella në historinë e klubit katalanas. Emra si Rivaldo, Riquelme, Litmanen, Giovanni, Hadji, Stoichkov, Maradona, Ronaldinho dhe Lionel Messi kanë mbajtur këtë fanellë të famshme, duke u shndërruar në ikona të padiskutueshme të futbollit botëror.
Pas largimit të Messit, pritshmëritë në “Camp Nou” u përqendruan te Ansu Fati, një produkt i akademisë së mirënjohur La Masia, i cili trashëgoi numrin “10″ dhe statusin e liderit të ri të skuadrës. Me një pagë prej 14 milionë eurosh në vit, ndër më të lartat në klub, ai u pa si pasardhësi i natyrshëm i yllit argjentinas.
Megjithatë, dëmtimet e shpeshta dhe forma e paqëndrueshme penguan ngritjen e tij. Ndeshja e javës së 37-të të La Ligës kundër Villarrealit do të shënojë fundin e aventurës së Fatit me fanellën “blaugrana”.
Statistikat e këtij sezoni flasin vetë: nën drejtimin e trajnerit Hansi Flick, Fati u aktivizua në vetëm 8 ndeshje, duke grumbulluar 186 minuta në total, pa asnjë gol apo asist të regjistruar. Nga një vlerësim prej 80 milionë eurosh në “Transfermarkt” tre vite më parë, sot kartoni i tij vlerësohet vetëm 10 milionë euro.
Lamine Yamal, shpresa e re me numrin 10
Me largimin e Fatit, fanella me numrin “10″ do të kalojë në pronësi të Lamine Yamal, një tjetër talent i rrallë nga akademia e Barcelonës. Vetëm 17 vjeç, Yamal ka mahnitur këtë sezon me paraqitjet e tij, duke u shndërruar në lider si për Barçën, ashtu edhe për kombëtaren spanjolle.
Ai është ndër zbulimet më të mëdha të Kampionatit Europian, ku me lojën e tij dinamike dhe pjekurinë teknike ka konfirmuar statusin si një prej futbollistëve më të mirë të rinj në botë. Këtë sezon ai ka shënuar 17 gola dhe ka dhuruar 21 asiste, një bilanc mbresëlënës për një lojtar në moshë kaq të re.
Barcelonës i mbetet të shpresojë se Yamal do të jetë ai që do të rikthejë lavdinë dhe prestigjin e fanellës me numrin “10″, duke shmangur fatin e Ansu Fatit dhe duke ndjekur hapat e legjendave të së kaluarës.
