Pas përmbylljes së suksesshme të seancës konstituive të Kuvendit të Republikës së Kosovës, kryetari i ri i Kuvendit, Dimal Basha, ka pritur në takim kryeministrin e vendit, Albin Kurti.
Gjatë takimit, kryetari Basha e falënderoi kryeministrin Kurti për përkushtimin e Qeverisë në realizimin e synimeve të përbashkëta për zhvillim dhe drejtësi shoqërore. Të dy zyrtarët theksuan rëndësinë e koordinimit ndërinstitucional dhe zbatimit të agjendës legjislative në këtë legjislaturë.
Në diskutim u nënvizua gjithashtu nevoja për të proceduar me formimin dhe votimin e institucioneve të reja që burojnë nga Kuvendi i Kosovës. Kryeministri Kurti njoftoi se Kryetarja e Këshillit të Përgjithshëm të Lëvizjes Vetëvendosje, Arbërie Nagavci, si përfaqësuese e subjektit fitues të zgjedhjeve, do ta dorëzojë emrin e mandatarit për formimin e Qeverisë tek Presidentja e vendit, në përputhje me procedurat ligjore.
“Si Kuvend, do të vazhdojmë të punojmë me përgjegjësi të plotë në funksion të përmbushjes së detyrimeve kushtetuese dhe ligjore. Besimi i qytetarëve është udhërrëfyesi ynë kryesor. Në këtë frymë, uroj që kjo legjislaturë të shërbejë me përgjegjësi dhe përkushtim në mbrojtjen e interesave të qytetarëve që përfaqësojmë,” deklaroi kryetari Basha.
Në fund të takimit, kryeministri Kurti i dhuroi kryetarit Basha një pikturë të titulluar “Pranvera Shqiptare”, punim i autorit Rexhep Selimi. Kryetari Basha e cilësoi dhuratën si simbolikë të veçantë, duke theksuar se Selimi, ndonëse po mbahet padrejtësisht në Hagë, mbetet gjithmonë i pranishëm në jetën politike e kulturore të vendit përmes veprës së tij në luftë, në Kuvend dhe në art.
