Ministri i Infrastrukturës dhe Transportit, Dimal Basha, ka deklaruar se kryeministri Albin Kurti i kishte ofruar presidentes Vjosa Osmani një rol të rëndësishëm në qeveri.
Në emisionin Debat Plus në TV Dukagjini, Basha tha se Kurti kishte propozuar që Osmani të bëhej zëvendëskryeministre e parë e Kosovës, duke marrë njëkohësisht edhe drejtimin e Ministrisë së Punëve të Jashtme.
Sipas tij, oferta ishte bërë në kuadër të përpjekjeve për të kapërcyer mospajtimet politike dhe për të gjetur një figurë konsensuale.
“Për shkak të bashkëpunimit që e kemi pas, kryeministri i ka thënë presidentes se mund të gjendet një figurë konsensuale për ta tejkaluar krizën. Ai i ka propozuar që të bëhet zëvendëskryeministrja e parë dhe të marrë drejtimin e diplomacisë”, u shpreh Basha.
Kritika ndaj PDK-së
Ministri i Infrastrukturës kritikoi gjithashtu Partia Demokratike e Kosovës për mungesë propozimesh konkrete në procesin e zgjedhjes së presidentit.
Sipas Bashës, PDK-ja do të kishte mundur t’i vinte në vështirësi partitë e tjera nëse do të kishte propozuar kandidatë të pranueshëm për këtë post.
Ai tha se nëse do të paraqiteshin emra që gëzonin mbështetje të gjerë, partitë tjera në Kuvend do ta kishin të vështirë t’i refuzonin.
“PDK-ja ka pasur mundësi të vendosë të gjithë në pozitë të vështirë nëse do të kishte dalë me dy emra të denjë për president. Por nuk është propozuar asnjë emër”, deklaroi Basha.
