Bashkimi Evropian ka ngritur alarmin për një fushatë të koordinuar ruse që synon destabilizimin politik të institucioneve evropiane, si dhe përgatitjen e një sulmi masiv ndaj Ukrainës me mijëra dronë. Zëdhënësi i Komisionit Evropian, Thomas Regnier, deklaroi se pas mocionit të mosbesimit ndaj presidentes Ursula von der Leyen qëndrojnë operacione të strukturuara ruse.
“Prej kohësh po ndjekim operacionet e Rusisë kundër BE-së dhe ndaj Presidentes së Komisionit. Fakt-verifikues të pavarur kanë identifikuar qartë këto ndërhyrje në kontekstin e mocionit të fundit ndaj saj”, theksoi Regnier. Ai paralajmëroi për përpjekje serioze të Moskës për të ndikuar brenda institucioneve evropiane në prag të zhvillimeve kyçe politike në Bruksel.
Në të njëjtën kohë, sipas mediave ukrainase, Rusia po përgatit një ofensivë ajrore të paparë, me deri në 2.000 dronë, duke synuar territore strategjike në Ukrainë. Lajmi është konfirmuar nga gjenerali gjerman Christian Freuding, kreu i Qendrës për Situatën në Ukrainë pranë Ministrisë së Mbrojtjes së Gjermanisë.
Freuding e cilësoi këtë kërcënim si “një sfidë serioze për mbrojtjen ajrore”, duke kërkuar “masa inteligjente kundërpërgjigjeje”. Ai paralajmëroi për koston e lartë të përdorimit të raketave Patriot për neutralizimin e dronëve kamikazë të tipit Shahed, të cilët prodhohen me një kosto shumë më të ulët (30-50 mijë euro), ndërkohë që një raketë Patriot kushton mbi 5 milionë euro.
Ndërkohë, gjatë natës së kaluar, Forcat Ajrore të Ukrainës njoftuan për një sulm me 57 dronë, kryesisht të tipit Shahed, ndaj qytetit të Zaporizhjës dhe zonave në vijën e parë të frontit në rajonet Donetsk, Kharkiv, Sumy dhe Dnipropetrovsk. Sipas raportimeve, fragmentet e dronëve të rrëzuar kanë rënë në gjashtë zona të ndryshme të vendit.
“Forcat ruse nuk ndalen. Një valë e re dronësh Shahed po afrohet nga verilindja,” përfundon njoftimi zyrtar i ushtrisë ukrainase, duke sinjalizuar për një përshkallëzim të mëtejshëm të konfliktit në javët në vijim.
