Presidentja e Komisionit Europian, Ursula von der Leyen, gjatë fjalimit në seancën plenare të Parlamentit Europian në Strasburg, ka prezantuar pesë prioritetet që Bashkimi Europian i konsideron të panegociueshme për çdo marrëveshje paqeje mes Ukrainës dhe Rusisë.
1. Paqe e drejtë dhe garanci reale sigurie për Ukrainën
Marrëveshja duhet të sjellë një paqe të qëndrueshme dhe të mbështetet në garanci të qarta sigurie për Kievin. BE kundërshton çdo formulë që kufizon ushtrinë ukrainase ose e lë vendin të ekspozuar ndaj agresioneve të ardhshme. Siguria e Ukrainës shihet si interes strategjik i të gjithë Europës.
2. Sovraniteti dhe integriteti territorial i paprekshëm
BE refuzon çdo zgjidhje që pranon ndryshime kufijsh të imponuara me forcë. Ukraina duhet të mbetet e lirë të vendosë për rrugën e saj europiane, veçanërisht në procesin e integrimit në tregun e përbashkët dhe sektorin e mbrojtjes.
3. Financimi i Ukrainës për vitet 2026–2027
Komisioni Europian është gati të paraqesë një propozim ligjor për mbështetje financiare afatgjatë, duke përfshirë edhe përdorimin e aktiveve ruse të ngrira. Von der Leyen theksoi se barra nuk mund të bjerë vetëm mbi taksapaguesit europianë.
4. Roli kyç i BE-së në zbatimin e marrëveshjes
Zbatimi i marrëveshjes do të varet kryesisht nga BE dhe partnerët e NATO-s, nga garancitë e sigurisë deri te rindërtimi, sanksionet dhe procesi i anëtarësimit. Mesazhi mbetet i qartë:
“Asgjë për Ukrainën pa Ukrainën, asgjë për Europën pa Europën, asgjë për NATO-n pa NATO-n.”
5. Kthimi i fëmijëve të rrëmbyer ukrainas
Prioritet i pandashëm është rikthimi i dhjetëra mijëra fëmijëve të rrëmbyer nga Rusia. “Ne nuk do t’i harrojmë,” deklaroi von der Leyen.
