Komisioni Evropian ka konfirmuar nisjen e procesit drejt heqjes graduale, të kushtëzuar dhe të kthyeshme të masave ndëshkuese ndaj Kosovës. Lajmi është bërë i ditur përmes një përgjigjeje me shkrim nga zyra për shtyp e këtij institucioni, ku theksohet se puna në këtë drejtim ka nisur zyrtarisht.
Kësaj faze i ka paraprirë një shkëmbim qëndrimesh mes vendeve anëtare të Bashkimit Evropian gjatë takimit të ministrave të jashtëm në muajin prill. Megjithatë, burime diplomatike në Bruksel bëjnë të ditur se, për momentin, lëvizjet janë kryesisht simbolike dhe jo thelbësore.
Në kuadër të këtij hapi fillestar, Bashkimi Evropian ka zhbllokuar funksionimin e nënkomiteteve me Kosovën si dhe ka rifilluar asistencën teknike përmes Fondit të Investimeve për Ballkanin Perëndimor.
Sipas të njëjtave burime, për një heqje të plotë të masave ndëshkuese kërkohet pajtimi unanim i të gjitha vendeve anëtare të BE-së. Një konsensus i tillë, sipas tyre, do të mundësohej vetëm pas ndërmarrjes së veprimeve të qarta nga ana e autoriteteve kosovare për uljen e tensioneve në veri të vendit – siç është kërkuar në konkluzionet e dhjetorit të kaluar.
Heqja graduale e masave pritet të ecë paralelisht me përmbushjen e këtyre kushteve, ndërsa BE mbetet në pritje të hapave konkret nga qeveria e Kosovës.
