Vetëm një vit pas miratimit të Akti të Inteligjencës Artificiale të BE-së (2024), i cilësuar si ligji i parë historik global për rregullimin e teknologjisë, Bashkimi Evropian po shqyrton një pezullim të pjesshëm të zbatimit të tij.
Kërkesa për një pushim ka fituar terren gjatë verës, mes lobimit të fuqishëm të industrisë dhe shqetësimeve për mungesë të standardeve teknike. Një opsion në diskutim parashikon që kompanitë që shkelin rregullat mbi përdorimet me rrezik të lartë të marrin një afat shtesë deri në një vit për t’u përshtatur.
Kritikat dhe dilemat
Ky zhvillim shihet si një kthesë e habitshme për BE-në, e cila deri më tani ishte në pararojë të rregullimit global të inteligjencës artificiale. Ish-kryeministri italian Mario Draghi e quajti ligjin një “burim pasigurie” dhe kërkoi pezullimin e tij derisa të kuptohen më mirë të metat.
Rregullat më të rrepta pritet të hyjnë në fuqi në gusht 2026, duke prekur sistemet e përdorura në burime njerëzore, arsim dhe gjyqësor. Por, sipas industrisë, mungesa e standardeve teknike e bën zbatimin pothuajse të pamundur.
Lëvizjet politike
-
Polonia ka propozuar shtyrjen e gjobave për shkelësit me 6 deri në 12 muaj, duke paralajmëruar se startup-et mund të largohen drejt juridiksioneve më pak të rregulluara.
-
Suedia dhe Republika Çeke janë gjithashtu në favor të një pauze.
-
Komisioni Evropian ka hapur konsultime për thjeshtimin e paketës së teknologjisë dhe pritet të paraqesë më 8 tetor një draft për rregullime të synuara.
Reagimet e Parlamentit Evropian
Ligjvënësit pritet të diskutojnë situatën më 15 tetor. Deputetja e të Gjelbërve, Kim van Sparrentak, u shpreh kundër pezullimit:
“Është e çuditshme të diskutojmë ndryshime pa e parë ende si funksionon ligji në praktikë.”
Megjithatë, ajo pranoi se fokusi tani është tek “kufizimi i dëmit”, ndërsa BE-ja përballet me presionin e SHBA-së dhe Kinës në garën globale për teknologjinë.
