Bashkimi Evropian ka miratuar në parim paketën e 17-të të sanksioneve kundër Rusisë, që prej nisjes së pushtimit të plotë të Ukrainës në vitin 2022. Masat e reja, të hartuara para ultimatumeve të fundit nga liderët evropianë për Kremlinin, synojnë të rrisin presionin ndërkombëtar ndaj Moskës për të pranuar një armëpushim të mbështetur nga SHBA-të.
Sipas presidencës polake të BE-së, diplomatët e 27 shteteve anëtare kanë arritur pajtim për këtë paketë në një takim në Bruksel, ndërsa miratimi zyrtar pritet të bëhet të martën e ardhshme.
Në fokus të masave të reja është lista e zezë e afro 200 cisternave të naftës që dyshohet se përdoren për të anashkaluar embargon ndaj eksporteve të naftës ruse. Gjithashtu, kompani nga vende si Vietnami, Serbia dhe Turqia, të akuzuara për ndihmë logjistike dhe furnizime për ushtrinë ruse, do të përballen me ndalime dhe kufizime shtesë.
Paketa përfshin gjithashtu ndëshkime për dhjetëra zyrtarë rusë, të cilët do t’i shtohen listës ekzistuese prej rreth 2,400 personash dhe entitetesh që përballen me ngrirje pasurish dhe ndalim udhëtimi. Objekt i sanksioneve janë gjithashtu individë të përfshirë në sulme kibernetike, shkelje të të drejtave të njeriut dhe akte sabotimi brenda Evropës.
Megjithëse BE-ja e pranon se kjo paketë është më e kufizuar krahasuar me masat e mëparshme, për shkak të sfidave në arritjen e konsensusit, liderët evropianë kanë paralajmëruar për “sanksione të mëdha” në rast se Moska refuzon propozimin amerikan për një armëpushim 30-ditor në Ukrainë.
Kancelari gjerman Friedrich Merz deklaroi të martën se Rusia do të përballet me masa më të ashpra nëse nuk ka “përparim të mirëfilltë” drejt paqes këtë javë. Ai i bëri thirrje presidentit rus Vladimir Putin të ulet në tryezën e bisedimeve me presidentin ukrainas Volodymyr Zelensky në Stamboll, të enjten.
Presidenti amerikan Donald Trump ka shprehur gatishmërinë për të marrë pjesë në takimin eventual, nëse të dy liderët kryesorë do të ulen në bisedime. Deri më tani, nga ana e Kremlinit nuk ka pasur ndonjë sinjal se presidenti Putin do të marrë pjesë.
Përpjekjet diplomatike ndërkombëtare vijojnë, ndërsa tensionet dhe presioni ndaj Moskës po intensifikohen për të ndalur luftën dhe për të arritur një zgjidhje të qëndrueshme paqësore.
