Përshkallëzimi i konfliktit në Lindjen e Mesme mund të dëmtojë aftësinë e Ukrainës për t’u mbrojtur nga agresioni rus, ka paralajmëruar shefja e diplomacisë së Bashkimit Evropian, Kaja Kallas.
Duke folur para një samiti virtual mes ministrave të jashtëm të BE-së dhe vendeve të Gjirit, Kallas tha se lufta kundër Iranit po shteron rezervat globale të sistemeve të mbrojtjes ajrore që i nevojiten urgjentisht Ukrainës në luftën kundër Rusisë.
“Ka kapacitete mbrojtëse që i duhen Ukrainës dhe që tani po zhvendosen edhe në Lindjen e Mesme”, tha ajo, duke shtuar se konflikti po ndikon drejtpërdrejt edhe në zinxhirët e furnizimit me sisteme të mbrojtjes ajrore dhe pajisje kundër dronëve.
Sipas saj, disa vende të Gjirit, përfshirë Emiratet e Bashkuara Arabe, kanë përdorur rezervat e tyre të mbrojtjes ajrore për të zmbrapsur sulmet me dronë dhe raketa nga Irani, pas sulmeve amerikano-izraelite në territorin iranian.
Kallas paralajmëroi gjithashtu se rritja e çmimeve të naftës si pasojë e konfliktit mund të përfitojë Rusia financiarisht.
“Kur çmimi i naftës rritet, kjo i sjell përfitime Rusisë për të financuar luftën e saj”, tha ajo, duke theksuar nevojën për të kufizuar të ardhurat energjetike të Moskës përmes sanksioneve të reja.
Diplomatja e lartë evropiane theksoi gjithashtu se Ukraina mund të ndihmojë vendet e Gjirit me përvojën e saj në mbrojtjen kundër dronëve dhe raketave ruse.
“Ne shohim të njëjtat dronë që sulmojnë Kiev çdo ditë duke u përdorur edhe në Lindjen e Mesme. Ukraina ka zhvilluar sisteme dhe taktika për t’i ndaluar ato”, tha Kallas.
Kjo çështje pritet të diskutohet në takimin virtual të ministrave të jashtëm të BE-së dhe vendeve të Gjirit gjatë së enjtes.
