Bashkimi Evropian është duke përgatitur një sërë lëshimesh të reja ndaj Shteteve të Bashkuara në përpjekje për të shmangur një përplasje të mundshme tregtare. Ndonëse zyrtarisht përfaqësuesit e BE-së deklarojnë me këmbëngulje se “një marrëveshje është pranë”, në prapaskenë mbizotëron pasiguria, ndërsa negociatorët europianë e pranojnë se “po ecin në terr”.
Marrëveshje me çdo kusht?
Qëndrimi i Gjermanisë se një marrëveshje duhet të arrihet, madje edhe nëse është e pafavorshme, po fiton gjithnjë e më shumë terren në Bruksel. Kancelari gjerman Friedrich Merz ka shprehur një “optimizëm të kujdesshëm”, duke shtyrë afatin për një marrëveshje deri në fund të korrikut. “Qëllimi ynë është të arrijmë një marrëveshje me tarifa sa më të ulëta dhe sa më shpejt të jetë e mundur,” deklaroi ai.
Ndërkohë, presidenti amerikan Donald Trump ka dërguar letra “paralajmëruese” edhe për shtatë vende të tjera, përfshirë Brazilin, ndaj të cilit pritet një tarifë ndëshkuese prej 50%. Në mënyrë paradoksale, Brukseli ende nuk ka marrë një letër të tillë, çka shton paqartësinë mbi strategjinë e administratës Trump ndaj BE-së.
Brukseli në kërkim të qartësisë
Nga automobilët te produktet bujqësore dhe nga çeliku te farmaceutikët, BE nuk ka një pamje të qartë të kërkesave reale të Uashingtonit. “Trump do para,” tha në mënyrë të pavetëdijshme një komisioner europian pas një seance në Parlamentin Europian.
Kjo përforcohet edhe nga qëndrimi i Thesarit amerikan, i cili llogarit se nga tarifat e reja mund të arkëtojë rreth 300 miliardë dollarë për të riformatuar buxhetin e SHBA-së.
Ursula von der Leyen: “Të përgatitur për çdo skenar”
Presidentja e Komisionit Evropian, Ursula von der Leyen, deklaroi të mërkurën: “Shtetet e Bashkuara kanë vendosur tarifa për 70% të tregtisë që BE zhvillon me to. Ne do të jemi të palëkundur, por preferojmë një zgjidhje të negociuar.” Ndërkohë, zëvendëspresidenti Maroš Šefčovič është angazhuar në biseda intensive me përfaqësuesin amerikan Greer për të orientuar më mirë negociatat.
Tarifat dhe kompromiset
Për momentin, Brukseli pritet të bëjë disa lëshime të ndjeshme, përfshirë reformën e stablecoin-ëve – kriptomonedha të mbështetura në asete të qëndrueshme – të cilat janë favorizuar nga Trump si pjesë e planeve të tij financiare për vitet e ardhshme.
Megjithatë, nëse SHBA shkon drejt vendosjes së tarifave të reja mbi 10% për sektorë kyç si automjetet dhe bujqësia, atëherë BE do të detyrohet të reagojë. Përndryshe, rrezikon të humbasë terren ekonomik në përballjen me një nga partnerët e saj më të mëdhenj tregtarë.
BE synon diversifikim
Sipas një analize të Komisionit Evropian, humbjet nga eksportet drejt SHBA-ve mund të rikuperohen deri në 75% përmes marrëveshjeve të reja me bllokun e Mercosur-it, Indinë dhe Kinën. Në këtë kuadër, një delegacion i nivelit të lartë i BE-së, i kryesuar nga von der Leyen dhe kryeministri portugez António Costa, pritet të udhëtojë drejt Pekinit në fund të muajit për një takim me presidentin kinez Xi Jinping.
Në kushtet e një lufte të hapur ekonomike, Europa përpiqet të mbajë balancën mes presionit amerikan dhe interesave të veta strategjike. Një marrëveshje, qoftë edhe e papërsosur, duket se është më e preferueshme sesa përshkallëzimi i konfliktit tregtar.
Burimi: La Repubblica
