Këshilli i Bashkimit Evropian ka vendosur zgjatjen e mandatit të Misionit të BE-së për Sundimin e Ligjit në Kosovë (EULEX) deri më 14 qershor 2027. Vendimi u mor më 5 qershor 2025 në një takim në Luksemburg dhe erdhi pas një rishikimi strategjik të funksionimit të misionit.
Sipas konkluzioneve të miratuara nga Komiteti Politik dhe i Sigurisë i BE-së, EULEX do të vazhdojë të operojë në Kosovë me mandatin aktual edhe për dy vite të tjera. Kjo është hera e dytë radhazi që mandati i këtij misioni zgjatet – hera e fundit ishte më 5 qershor 2023, kur afati u shty deri më 14 qershor 2025.
Për të mbuluar shpenzimet e operimit gjatë periudhës së re të mandatit, Bashkimi Evropian ka alokuar një fond prej 170,866,980 euro. Nga kjo shumë:
-
64,492,980 euro janë dedikuar për shpenzimet e misionit në Kosovë,
-
ndërsa 106,374,000 euro janë parashikuar për mbështetjen e procedurave gjyqësore të zhvendosura në një shtet anëtar të BE-së.
Misioni EULEX u themelua më 4 shkurt 2008, pas shpalljes së pavarësisë së Kosovës, duke zëvendësuar misionin e Kombeve të Bashkuara (UNMIK), por me një mandat më të kufizuar. Që nga ajo kohë, roli i EULEX-it ka pësuar ndryshime të ndjeshme, veçanërisht pas vitet 2011 dhe 2012, kur përfundoi mbikëqyrja ndërkombëtare e pavarësisë së Kosovës dhe kompetencat e misionit u reduktuan ndjeshëm.
Aktualisht, EULEX fokusohet në monitorimin e sistemit të drejtësisë në Kosovë, mbështetjen e sundimit të ligjit dhe bashkëpunimin me institucionet vendore dhe ndërkombëtare në çështje të ndjeshme ligjore dhe gjyqësore.
