Kryetari i Partisë Demokratike të Kosovës, Bedri Hamza, ka mbajtur sot mbledhjen e tij të parë me Kryesinë e PDK-së pas zgjedhjes si lider i partisë. Në një konferencë për media pas takimit, Hamza deklaroi se PDK hyn në zgjedhjet e 28 dhjetorit e bashkuar, e organizuar dhe e bindur se do të dalë fituese.
“Më 28 dhjetor, PDK është gati për fitore. Kosova ka nevojë për stabilitet, unitet dhe një qeveri që punon me të gjithë akterët e brendshëm e partnerët ndërkombëtarë. Ne, së bashku me qytetarët, do ta hapim një kapitull të ri për vendin”, tha ai.
Mobilizim i plotë në terren
Hamza bëri të ditur se Kryesia e PDK-së ka marrë vendime organizative për mobilizim në çdo komunë, lagje dhe strukturë të partisë. Ai konfirmoi se PDK po formon ekipin qendror, shtabin zgjedhor dhe po përgatit një listë “dinjitoze dhe përfaqësuese” të kandidatëve për Kuvend.
Platformë qeverisëse: ekonomi, stabilitet dhe integrim
Kreu i PDK-së tha se partia ka një platformë të qartë qeverisëse që synon:
-
zhvillim ekonomik
-
stabilitet politik
-
dialog të përgjegjshëm
-
sundim të ligjit
-
investime kapitale
-
integrim euroatlantik
Ai premtoi një fushatë të qetë dhe programore, duke shmangur gjuhën përçarëse dhe duke u fokusuar tek nevojat e qytetarëve.
Dera e hapur për qytetarët
Hamza u shpreh se PDK po zhvillon takime me degët dhe aktivistët në të gjithë vendin, duke theksuar se “dera e PDK-së është e hapur për këdo që dëshiron t’i bashkohet këtij vizioni”.
Mërgata, pjesë kyçe e procesit zgjedhor
Lideri i PDK-së vlerësoi lartë rolin e mërgatës në zgjedhje, duke theksuar se pjesëmarrja e tyre është vlerë e çmuar për demokracinë kosovare.
“PDK është parti e të gjithë qytetarëve të Kosovës, kudo që ndodhen”, tha Hamza.
Partia Demokratike e Kosovës pritet të hyjë në fushatën e 28 dhjetorit me ambicie të larta, duke synuar rikthimin në qeverisje pas disa vitesh në opozitë.
