Presidenti i Republikës së Shqipërisë, Bajram Begaj, ka ushtruar të drejtën e votës në Tiranë në kuadër të zgjedhjeve parlamentare që po mbahen sot në vend. I shoqëruar nga bashkëshortja e tij, kreu i shtetit vlerësoi procesin si të qetë dhe demokratik.
Pas votimit, Begaj u shpreh se 11 maji duhet të konsiderohet si një ditë feste për qytetarët shqiptarë, duke theksuar rëndësinë e pjesëmarrjes pa presion dhe me përgjegjësi.
“Kjo duhet të jetë një ditë e gëzuar, ku qytetarët shprehin lirisht vullnetin e tyre, pa presion dhe me përgjegjshmëri që zëri i tyre të dëgjohet,” tha ai për mediat.
Presidenti nënvizoi gjithashtu rëndësinë e standardeve demokratike në këtë proces, veçanërisht në kontekstin e hapjes së negociatave për anëtarësim në Bashkimin Evropian dhe pjesëmarrjes për herë të parë të diasporës në votim.
Sa i përket fushatës zgjedhore, Begaj kritikoi përdorimin e gjuhës bullizuese nga disa aktorë politikë, duke apeluar për një klimë të shëndetshme debati: “Në fushatë duhet të ketë ballafaqim idesh dhe programesh, jo gjuhë denigruese. Kjo është e papranueshme për politikanët dhe qytetarët.”
Presidenti përfundoi mesazhin e tij me një thirrje për administrim dhe numërim korrekt të votave, duke uruar që procesi të përmbyllet në mënyrën më të mirë të mundshme.
