Kreu i Partisë Demokratike, Sali Berisha, mori pjesë në punimet e Asamblesë Parlamentare të Këshilli i Europës në Strasburg, ku tentoi të denoncojë Shqipërinë si “narkoshtet”. Edhe pse, sipas raportimeve, Berisha ndodhej në Strasburg në mënyrë private dhe jo si pjesë e delegacionit zyrtar të PD-së, ai arriti të marrë fjalën në një nga seancat plenare.
Gjatë ndërhyrjes së tij, Berisha përsëriti akuza të rënda ndaj qeverisë shqiptare dhe kryeministrit Edi Rama, të cilin e quajti “Ramaduro”, duke pretenduar se zgjedhjet në Shqipëri janë deformuar nga lidhjet mes krimit të organizuar dhe politikës. Ai deklaroi se “28 deputetë kanë hyrë në parlament të mbështetur nga kartelet e drogës” dhe se qeveria ka bllokuar hetime të SPAK.
Megjithatë, drejtuesja e seancës i ndërpreu fjalën, duke sqaruar se deklaratat e Berishës ishin jashtë rendit të ditës. Mikrofonit iu fik zëri, ndërsa përkthimi u ndërpre, pavarësisht se Berisha vijoi të fliste pa sukses. Në pamje të transmetuara nga media, shihet deputetja Albana Vokshi duke reaguar e tensionuar në momentin e ndërprerjes.
Incidenti u shfrytëzua politikisht nga mazhoranca në Tiranë. Taulant Balla publikoi videon e momentit në rrjete sociale, duke ironizuar Berishën dhe duke theksuar se rregullat e forumeve ndërkombëtare janë të ndryshme nga foltorja e Kuvendit të Shqipërisë.
Ndërkohë, nga kampi i PD-së nuk ka pasur një reagim zyrtar për ndërprerjen e fjalës, ndërsa vetë Berisha publikoi në rrjetet e tij sociale vetëm pjesë të fjalimit, duke lënë jashtë momentin kur mikrofoni iu fik nga drejtuesja e seancës.