Kancelari gjerman, Friedrich Merz, ka hedhur poshtë si “jo realiste” mundësinë që negociatat në vijim midis Bashkimit Evropian dhe Shteteve të Bashkuara të përfundojnë me një marrëveshje për eliminimin e plotë të tarifave doganore nga të dyja palët.
“Nuk është një skenar realist të besojmë se mund të arrihet një marrëveshje për tarifa zero nga të dyja anët,” deklaroi Merz në një konferencë për media të mbajtur të enjten në Berlin. Ai tha se është duke marrë pjesë intensivisht në këtë proces, si në kuadër të BE-së ashtu edhe në komunikim me shtetet anëtare.
Sipas tij, tarifat doganore – në çfarëdo niveli që të jenë – do të prekin të gjitha vendet, secilën në një shkallë të ndryshme. “Këto tarifa do të na godasin të gjithëve,” theksoi Merz, duke paralajmëruar se ndikimi afatgjatë i tyre do të jetë negativ jo vetëm për Evropën, por edhe për ekonominë amerikane.
Kancelari gjerman njoftoi gjithashtu se ka pasur kontakte të drejtpërdrejta me administratën amerikane, përfshirë një bisedë telefonike me Presidentin Donald Trump të premten e kaluar. Duke iu referuar deklaratave të mëparshme të Trump, Merz përmendi edhe shprehjen e njohur të presidentit amerikan: “I dua tarifat”.
Gjermania, sipas Merz, mbështet përpjekjet e Komisionit Evropian për të gjetur një zgjidhje të “arsyeshme”, ndërsa theksoi se “sa më të ulëta të jenë tarifat nga të dyja palët, aq më mirë për të dyja palët”.
Megjithatë, ai nuk përjashtoi mundësinë e arritjes së një marrëveshjeje të pjesshme sektoriale në vend të një pakti gjithëpërfshirës. “Ka gjasa që ndodhemi në fazën përfundimtare të negociatave, të cilat duhet të përmbyllen deri nga mesi i javës së ardhshme,” shtoi ai.
Merz përfundoi se, ndonëse synimet për tarifa zero janë idealiste, ato nuk përputhen me realitetin aktual të politikave tregtare amerikane, sidomos nën administratën Trump dhe projektligjin e propozuar “One Big Beautiful Bill”.
