Zëvendëskryeministri i parë në detyrë për Integrim Evropian, Zhvillim dhe Dialog, Besnik Bislimi, ka marrë pjesë në takimin joformal të ministrave për çështje evropiane, të organizuar nga Ministria e Punëve të Jashtme e Danimarkës në kuadër të Presidencës daneze të Këshillit të BE-së.
Në këtë tryezë morën pjesë ministra nga shtetet anëtare të BE-së dhe vendet aspiruese për anëtarësim, ndërsa tema e diskutimit ishte “Kriteret e Kopenhagës dhe integrimi gradual”.
Gjatë fjalës së tij, Bislimi theksoi se Kosova ka shënuar përparime të dukshme në zbatimin e reformave, duke përmendur:
-
rritjen më të shpejtë ekonomike në rajon,
-
uljen e papunësisë nga 23.8% në 10.9% në vetëm katër vite,
-
përmirësimin në renditjet ndërkombëtare,
-
si dhe dyfishimin e investimeve të huaja direkte.
Ai rikujtoi se aplikimi i Kosovës për anëtarësim në BE në dhjetor 2022 është tregues i synimit për integrim dhe se vendi tashmë ka afër një dekadë që zbaton Marrëveshjen e Stabilizim-Asocimit.
“Institucionet tona kanë dëshmuar nivel të lartë përgatitjeje dhe duhet të vlerësohen mbi bazën e meritokracisë. Është koha të pranojmë pyetësorin dhe të marrim statusin e vendit kandidat,” – tha Bislimi.
Në diskutim mori pjesë edhe Komisionerja për Zgjerim, Marta Kos, e cila së bashku me ministrat e pranishëm shkëmbyen pikëpamje mbi perspektivën evropiane të vendeve të Ballkanit Perëndimor.
