Administrata e presidentit amerikan Donald Trump ka zyrtarizuar krijimin e “Bordit të Paqes” për Gazën, një strukturë e re ndërkombëtare që synon mbikëqyrjen e përkohshme të territorit dhe menaxhimin e procesit të rindërtimit pas luftës mes Izraelit dhe Hamasit.
Sipas një deklarate të Shtëpisë së Bardhë, ndër anëtarët themelues të bordit janë Sekretari amerikan i Shtetit Marco Rubio dhe ish-kryeministri i Mbretërisë së Bashkuar Tony Blair. Në përbërje bëjnë pjesë gjithashtu i dërguari i posaçëm i Trumpit për Lindjen e Mesme, Steve Witkoff, si dhe Jared Kushner, dhëndri i presidentit.
Vetë Trump do të shërbejë si kryetar i bordit, i cili është pjesë e planit të tij prej 20 pikash për arritjen e një marrëveshjeje paqeje dhe stabilizimin afatgjatë të Gazës. “Ky është bordi më i madh dhe më prestigjioz i mbledhur ndonjëherë”, ka deklaruar Trump, duke paralajmëruar se emra të tjerë do t’i bashkohen strukturës në javët në vijim.
Në bordin ekzekutiv themelues përfshihen gjithashtu Marc Rowan, drejtues i një firme private kapitali, presidenti i Bankës Botërore Ajay Banga dhe këshilltari amerikan i sigurisë kombëtare Robert Gabriel. Çdo anëtar, sipas Shtëpisë së Bardhë, do të ketë një portofol specifik, të konsideruar “kritik për stabilizimin dhe suksesin afatgjatë të Gazës”.
Sir Tony Blair, i cili ka luajtur më herët rol kyç si i dërguar i Kuartetit për Lindjen e Mesme (SHBA, BE, Rusi dhe OKB), është i vetmi anëtar themelues që nuk është shtetas amerikan. Ai ka deklaruar se ndihet i nderuar për emërimin dhe se pret të kontribuojë në promovimin e paqes dhe prosperitetit në rajon, në përputhje me vizionin e presidentit Trump.
Krijimi i Bordit të Paqes vjen në një kohë kur armëpushimi në Gaza mbetet i brishtë dhe kushtet humanitare vazhdojnë të jenë kritike, sipas OKB-së. Plani amerikan parashikon gjithashtu vendosjen e një Force Ndërkombëtare Stabilizimi dhe demilitarizimin e plotë të territorit, përfshirë çarmatimin e Hamasit dhe grupeve të tjera palestineze.
Megjithatë, e ardhmja e Gazës dhe e mbi 2.1 milionë banorëve të saj mbetet e paqartë, ndërsa zhvillimet e reja diplomatike po ndiqen me vëmendje të lartë nga komuniteti ndërkombëtar.
