Ushtruesi i detyrës së ministrit të Drejtësisë, Blerim Sallahu, ka reaguar përmes një postimi në Facebook lidhur me situatën e krijuar rreth konstituimit të Kuvendit të Kosovës, duke theksuar se Gjykata Kushtetuese ka vetëm dy rrugëdalje kushtetuese.
Sipas Sallahut, opsioni i parë është që Gjykata, duke u bazuar në nenin 67, paragrafi 4 të Kushtetutës, të konstatojë qartë se refuzimi i Listës Serbe për të propozuar kandidatin e saj për nënkryetar të Kuvendit nënkupton heqje dorë nga kjo e drejtë. Në këtë rast, Kuvendi i Kosovës do të konsiderohej se ka përmbyllur fazën kushtetuese të konstituimit. Ai e krahasoi situatën me rastin e aktgjykimit të mëparshëm të Gjykatës Kushtetuese për krijimin e qeverisë, ku mosparaqitja e mandatarit u vlerësua si humbje e të drejtës për nominim.
Opsioni i dytë, sipas tij, lidhet me faktin se Kuvendi tashmë ka ezauruar edhe procedurën e shortit, e paraparë në Rregulloren e Kuvendit, tri herë për secilin kandidat. Në këtë rast, thotë Sallahu, aktgjykimi i mëparshëm i Kushtetueses është ekzekutuar plotësisht dhe, për shkak të mungesës së vullnetit të deputetëve për konstituimin e Kuvendit, Gjykata duhet t’i japë autorizim Presidentes për të shpallur zgjedhjet e jashtëzakonshme, duke u mbështetur në nenin 82 të Kushtetutës.
“Çdo vendim tjetër, në formë kundërkushtetuese, e bën Republikën tonë të varur nga një subjekt politik që çdo ditë minon rendin kushtetues të vendit”, përfundoi Sallahu.
