Kuvendi i Kosovës pritet të mblidhet sërish sot në orën 10:00 për të 33-tën herë radhazi, në përpjekje për konstituimin e tij, proces që po zvarritet për shkak të mungesës së konsensusit ndërmjet partive politike rreth zgjedhjes së Kryetarit të Kuvendit.
Lëvizja Vetëvendosje vazhdon të insistojë në kandidaturën e Albulena Haxhiut për postin e kryeparlamentares, pavarësisht kundërshtimit të partive opozitare. PDK dhe AAK i kanë bërë thirrje LVV-së që të propozojë një emër tjetër, ndërsa LDK ka deklaruar se nuk do të votojë asnjë kandidat për këtë pozitë.
Seancat për konstituimin e Kuvendit po mbahen çdo 48 orë, duke u kthyer në një rutinë procedurale pa progres konkret. Me këtë ritëm dhe mungesën e një marrëveshjeje politike, kriza institucionale në vend vazhdon të thellohet.
Kjo bllokadë, sipas analistëve politikë, po minon jo vetëm funksionalitetin e Kuvendit, por edhe besimin e qytetarëve në institucionet demokratike të vendit. Tashmë, të gjitha palët janë nën presion për të gjetur një zgjidhje që do të zhbllokojë procesin dhe do t’i hapë rrugë formimit të plotë të institucioneve.
