Për shkak të pranisë së madhe të ujit në rrugë, Policia e Kosovës ka njoftuar se është ndaluar përkohësisht qarkullimi i automjeteve në një segment të rrugës nacionale Ferizaj–Prishtinë.
Sipas njoftimit zyrtar, bllokimi ka të bëjë me pjesën e rrugës që kalon përmes fshatit Llapnasellë, konkretisht segmentin nga rrethi i “Prishtina Mall” në drejtim të Prishtinës dhe segmentin nga rrethi i “Marigona” në drejtim të Ferizajt. Vendimi është marrë në koordinim me zyrtarët e Ministrisë së Infrastrukturës dhe kompaninë përgjegjëse për mirëmbajtjen e rrugës.
Autoritetet bëjnë të ditur se qarkullimi i automjeteve do të devijohet dhe orientohet përmes autostradës, deri në përmirësimin e situatës dhe largimin e rrezikut për pjesëmarrësit në trafik.
Policia thekson se masa është ndërmarrë për arsye sigurie, me qëllim të mbrojtjes së qytetarëve dhe parandalimit të aksidenteve, duke u bërë thirrje shoferëve që të respektojnë udhëzimet në terren dhe sinjalizimin rrugor.
