Britania e Madhe ka realizuar sot hedhjen e parë ajrore të ndihmave humanitare në Rripin e Gazës, një rajon i goditur rëndë nga mungesa e ushqimit dhe kërcënimi i urisë masive, sipas agjencive të Kombeve të Bashkuara.
Në një deklaratë nga Downing Street, zyra e kryeministrit Keir Starmer bëri të ditur se pakot e para përmbanin furnizime jetike në vlerë prej afro gjysmë milioni paund, të cilat janë hedhur në zonat e rrethuara palestineze.
Ndërkohë, edhe Jordania dhe Emiratet e Bashkuara Arabe kanë ndërmarrë operacione të ngjashme, duke hedhur 52 paleta me ushqime mbi Gazë, siç konfirmon një deklaratë e ushtrisë izraelite.
Për herë të parë pas disa ditësh, edhe aviacioni egjiptian iu bashkua shpërndarjes ajrore të ndihmave – një zhvillim që pason lejimin e kufizuar të hyrjes së ndihmave nga Izraeli, pas një presioni ndërkombëtar në rritje.
Ushtria izraelite ka njoftuar gjithashtu për pauza të përditshme në luftime, të cilat aplikohen për qëllime humanitare dhe synojnë lehtësimin e dërgimit të ndihmave në zonat më të prekura të enklavës palestineze.
Sipas autoriteteve izraelite, Egjipti, Jordania dhe Emiratet e Bashkuara po veprojnë në bashkëpunim të drejtpërdrejtë me Izraelin për koordinimin e hedhjeve ajrore.
Por pavarësisht këtij mobilizimi, organizatat ndërkombëtare humanitare, përfshirë Mjekët pa Kufij, kanë kritikuar ashpër këtë metodë. Sipas tyre, shpërndarja ajrore është shumë e kushtueshme, joefektive dhe potencialisht e rrezikshme për civilët, pasi paletat që bien me parashutë mund të shkaktojnë dëmtime apo viktima në tokë.
Kjo ndërhyrje e Britanisë dhe shteteve arabe vjen në një moment kur Gaza përballet me një krizë të paprecedentë humanitare, dhe thirrjet për zgjidhje të qëndrueshme po bëhen gjithnjë e më të forta në arenën ndërkombëtare.
