Mbretëria e Bashkuar po kërkon të formojë një aleancë perëndimore të çelikut me Bashkimin Evropian – dhe potencialisht me Shtetet e Bashkuara – për t’u përballur me dominimin e Kinës në tregun global dhe për të shmangur tarifat e reja të Brukselit ndaj eksporteve britanike të çelikut.
Sipas burimeve të afërta me bisedimet, të cituara nga POLITICO, qeveria britanike po shqyrton mundësinë e një pakt tarifor të koordinuar që do të harmonizonte politikat tregtare midis BE-së, Britanisë dhe SHBA-së. Një bashkëpunim i tillë do t’i siguronte anëtarëve tarifa preferenciale dhe do t’u jepte atyre një front të përbashkët ekonomik kundër Kinës.
Shpresa në Londër është që një qasje e përbashkët me Brukselin të ndihmojë Britaninë të shmangë një taksë mbrojtëse 50% që BE planifikon të vendosë për të mbrojtur prodhuesit e vet nga mbiprodhimi industrial i Kinës.
Që prej Brexit-it, Mbretëria e Bashkuar është bërë më e ndjeshme ndaj politikave tregtare të BE-së, dhe aktualisht po kërkon përjashtime nga këto masa.
Një zyrtar i lartë i BE-së deklaroi se blloku “nuk kishte zgjidhje tjetër përveçse të mbronte industrinë e vet”, por la të hapur mundësinë e bisedimeve me Londrën për të gjetur një zgjidhje të përbashkët.
Një tjetër zyrtar i BE-së, duke folur në kushte anonimiteti, tha se ideja e një “klubi të çelikut” perëndimor ka qarkulluar prej kohësh, por tani “po bëhet më tërheqëse”.
BE-ja dhe Britania tashmë bashkëpunojnë në forume ndërkombëtare, si Forumi Global për Kapacitetin e Tepërt të Çelikut, dhe kanë harmonizuar taksat e karbonit mbi importet e çelikut dhe produkteve të ndotshme.
Ndërkohë, Shtetet e Bashkuara po nxisin koordinim më të ngushtë kundër çelikut kinez, me përfaqësuesin e tregtisë amerikane, Jamieson Greer, që paralajmëroi se “rregullat aktuale të tregtisë janë të pamjaftueshme” përballë subvencioneve të Pekinit.
Ai theksoi se kërkohet “vullnet politik i përbashkët” për të frenuar ndikimin ekonomik të Kinës.
Britania aktualisht eksporton mbi gjysmën e prodhimit të saj të çelikut në BE, ndaj çdo tarifë e re nga Brukseli do të kishte pasoja serioze për industrinë vendase.
Drejtori i Shoqatës së Çelikut të Mbretërisë së Bashkuar, Gareth Stace, tha se “prioriteti i qeverisë duhet të jetë sigurimi i përjashtimeve në kuotat e BE-së dhe forcimi i mbrojtjes tregtare”.
Megjithatë, ai pranoi se një aleancë më e gjerë perëndimore mund të ndihmojë në zgjidhjen e problemit global të mbikapacitetit dhe në parandalimin e importeve të subvencionuara që dëmtojnë tregun britanik.
Një zëdhënës i qeverisë britanike konfirmoi përpjekjet e vazhdueshme për dialog me BE-në:
“Ne po vazhdojmë angazhimet me partnerët tanë evropianë dhe ndërkombëtarë për të gjetur zgjidhje që adresojnë mbikapacitetin global të çelikut,” – tha ai.
Në thelb, Londra po kërkon të shmangë një tjetër goditje ekonomike pas Brexit-it – këtë herë nga armiku i heshtur prej çeliku, Kina.
